最新最潮 一站式搵食平台

隱世文青台灣菜 充滿台灣的味道—木玥巷

0 229

隱世文青台灣菜 充滿台灣的味道—木玥巷

木玥巷係以日系裝修嘅台灣菜餐廳,一共有兩間分店,一間係屯門紅橋附近力生大廈地下,一間係元朗富來花園地下。木玥巷一直都人氣高企,經常要排隊。小編今次去嘅係元朗分店,店內裝修以淺木色作為主調,空間都尚算闊落舒適,近街位置係落地玻璃嘅高枱,有啲地方嘅高枱會因調腳而坐得唔舒服,但呢到唔會之餘櫈下仲有儲物空間,方便客人放袋,而另一邊係沙發卡座,座位舒適。

食品介紹:麻辣鴨血・樹子炒水蓮・蟹肉金絲炒新竹米粉・干貝醬海鮮炒飯・黑糖苿莉花冬瓜茶

麻辣鴨血

鴨血夠大舊,又入味,裏面仲有蜂巢豆腐同金菇作配菜,充份吸收湯汁嘅味道,當咬落蜂巢豆腐嘅時候,湯汁會一湧而出,好有滿足嘅感覺。佢一啲都唔似平日出邊賣嘅現成鴨血淨係辣同麻,木玥巷呢個係入口有少少辣,吞後帶有點點麻嘅感覺,佢嘅辣並唔會覆蓋左鴨血原本嘅味道同口感,怪唔之得佢會推薦比食客

樹子炒水蓮

水蓮係台灣先有嘅菜,係台灣直送到港,所以每日限量供應,真係充滿台灣嘅回憶同味道。好多台灣餐館嘅燙青菜都做唔到台灣嘅醬汁同味道,只係會好似平日炒菜般,而佢真係做到出黎,令小編喜出望外,所以小編覺得呢個係必點小食之一

蟹肉金絲炒新竹米粉

金黃色嘅米粉加上滿滿嘅蟹肉,加上瑤柱及芽菜作為點綴,米粉炒得非常乾身,佢並唔會好似出邊咁一大束,好難夾咁,佢地會先分小段,令客人進食時方便,非常體貼。炒新竹米粉比起其他餸菜會較為淡,建議先行進食。


- 廣告-
咖啡愛好者注意!100%原印尼咖啡『伯迪咖啡』讓你每天早上飲完全日好心情

干貝醬海鮮炒飯

炒飯比起其他食物相對就較為普通,不過係好食嘅,炒飯乾身得黎唔會好油,份量充足料又多,絕對無偷工減料嫁!

黑糖苿莉花冬瓜茶

呢啲冬瓜茶同出邊嘅有啲唔同,通常係街都係冬瓜茶配奶呀,配檸檬呀咁,而呢個係配合左黑糖同苿莉花茶,第一啖入口感覺會有一啲複雜,因為有好多味道會一次過充斥於口腔內,但飲第二啖嘅時候就會慢慢習慣到。小編叫左少甜,所以飲落唔會好甜,會有淡淡嘅黑糖味,冬瓜茶味都非常之出,水同冬瓜茶嘅比例岩岩好,吞後會有淡淡苿莉味散出,為飲品嘅味道做左個總結

職員服務不錯,上菜速度都快,價錢親民又高質,小編一定會再去食

 

木玥巷
元朗媽橫路9號富來花園地下17-18號舖

屯門井財街7號力生大廈地下4-5號舖

 

 

 

 

0
    0
    Your Cart
    Your cart is emptyReturn to Shop